Hybiau a Llyfrgelloedd sy’n Deall Niwrowahaniaeth

Fel rhan o’r gwaith o adeiladu Caerdydd sy’n Deall Niwrowahaniaeth, rydyn ni wedi derbyn Cyllid Ffyniant Gyffredin ac rydyn ni’n gweithio gyda’n Hybiau a’n llyfrgelloedd i’w gwneud nhw’n fwy hygyrch a chynhwysol i bobl sy’n niwrowahanol.

Mae gennym Hyrwyddwyr Gweithle Niwrowahanol wedi eu hyfforddi gan DoIt Solutions sydd yn cefnogi cydweithwyr i hyrwyddo a datblygu adnoddau niwrowahanol ac ymwybyddiaeth yn eu gweithle.

Mae staff hybiau hefyd wedi cael hyfforddiant a gyflwynir gan Autentic i ddeall

• cyfathrebu
• gofodau, ac
• iaith sy’n cefnogi pobl niwrowahanol.

Gallwch ddysgu mwy am rai o’r ffyrdd rydym yn gwneud ein Hybiau a’n llyfrgelloedd yn well i bobl niwrowahanol.

Teithiau rhithwir

Rydym wedi ffilmio teithiau o’n holl Hybiau a llyfrgelloedd fel y gallwch gynllunio eich ymweliad ymlaen llaw ac ymgyfarwyddo â’r gofod. Yn y teithiau rhithwir hyn gallwch ddod o hyd i:

• ddolenni at weithgareddau sy’n digwydd,
• gwybodaeth am wasanaethau,
• mapiau synhwyraidd a mapiau llawr,
• gwybodaeth ynghylch pryd y bydd yr Hyb neu’r llyfrgell yn brysur, a
• chyfle i roi adborth am eich ymweliad rhithwir.

Adnoddau synhwyraidd

Mae Prosiect Hybiau Caerdydd sy’n Gyfeillgar i Niwroamrywiol, Grŵp Ieuenctid Scope a Grŵp Ieuenctid Neuro Roots wedi cydgynhyrchu’r casgliad o adnoddau synhwyraidd i wneud lleoedd astudio yn fwy hygyrch i’r rhai ag anghenion synhwyraidd.

Dewisodd y grwpiau ieuenctid plastig clir fel y gallwch weld y cynnwys a theimlo’n hyderus bod ganddynt adnoddau rydych chi am eu defnyddio cyn eu benthyca. Mae eitemau mwy fel rhanwyr desg a gorffwysfeydd cefn hefyd ar gael.

Mae’r bagiau’n cynnwys eitemau fel:

• teganau ffidlo
• amseryddion tywod,
• arlliwiau lliw,
• rhanwyr desg,
• ffaniau desg a lampau
• gweithgareddau lliwio meddwlgarwch, a
• chlustffonau atal sŵn.

Mae gennym hefyd adnoddau synhwyraidd a dodrefn arbenigol i blant eu defnyddio yn ystod eu hymweliad, fel:

• bagiau gyda theganau synhwyraidd, gan gynnwys amddiffynwyr clust i blant,
• byrddau golau synhwyraidd, a
• chadeiriau troelli.

Mannau tawel synhwyraidd

Bydd corneli synhwyraidd a meysydd tawelach ar gael yn ein Hybiau i chi eu defnyddio os ydych chi’n teimlo’n bryderus. Mae corneli synhwyraidd rhyngweithiol yn cefnogi hunanreoleiddio a thawelu ac yn cynnwys technoleg synhwyraidd fel::

• padiau seddi sy’n dirgrynu,
• carpedi sy’n disgleirio, a
• goleuadau uwchfioled y gellir eu rheoli.

Fe welwch gorneli synhwyraidd yn yr Hybiau hyn:

• Treganna,
• Llanedern,
• Llanrhymni,
• Pen-y-lan,
• Hyb Partneriaeth Tredelerch
• Llaneirwg,
• Radur
• STAR
• Ystum Taf,
• Y Tyllgoed.